HÖNNUNarVErÐlaUN íslaNds 2018

header

Forval dómnefndar til Hönnunarverðlauna Íslands 2018.

Hátt í 100 tilnefningar bárust dómnefnd sem nú hefur valið fjögur verk sem þykja framúrskarandi, einnig verður veitt viðurkenning fyrir bestu fjárfestingu í hönnun.

Hönnunarverðlaun Íslands 2018 verða afhent í fimmta sinn, föstudaginn 2. nóvember næstkomandi. Upplýsingar um tímasetningu og stað verða auglýst síðar.

Bækur í áskrift fyrir Angústúru forlag

Snæfríð & Hildigunnur

Angústúra forlag býður upp á vandaðar þýðingar í áskrift sem gefa innsýn í ólíka menningarheima. Snæfríð Þorsteins og Hildigunnur Gunnarsdóttir, grafískir hönnuðir, hönnuðu heildarútlit áskriftarbókaraðarinnar.

„Þó að bókin sé ævagamalt form er áskorun að hanna bók sem kallar á að hún sé tekin upp og lesin. Snæfríði og Hildigunni hefur tekist að hanna fallegt staðlað útlit sem hentar ólíkum verkum. Bækurnar eru sérstaklega læsilegar í uppsetningu og fara vel í hendi. Útlitið er hvort tveggja í senn minimalískt og nostalgískt og hönnuðurinn gefur sér svigrúm innan formsins til að skapa stemningu og andrúm til umhugsunar. Óttinn um örlög bókarinnar hverfur eins og dögg fyrir sólu.“

The Retreat við Bláa lónið & GeoSea sjóböð á Húsavík

Basalt arkitektar

The Retreat við Bláa lónið er nýtt hótel, veitingastaður og heilsulind, hannað af Basalt arkitektum í samstarfi við Design Group Italia og Sigurð Þorsteinsson. Annað nýtt baðsvæði úr smiðju Basalts arkitekta er GeoSea sjóböðin á Húsavíkurhöfða.

„Það krefst næmni og virðingar að hanna mannvirki í íslenskri náttúru en þar hafa Basalt arkitektar sýnt gott fordæmi og eru fyrirmynd þegar kemur að hönnun baðstaða. Þau hafa einstakt lag á því að tvinna mannvirki saman við náttúruna. Byggingarlistin er í hæsta gæðaflokki þar sem hvert smáatriði er úthugsað og rými eru hönnuð af virðingu og látleysi. Arkitektúrinn skapar ramma fyrir einstaka upplifun gesta í stórbrotinni náttúru landsins.“

Catch of the Day

Björn Steinar Blumenstein

Markmiðið með verkefni Björns Steinars Blumenstein, Catch of the day, er að berjast gegn matarsóun  sem er gríðarstórt vandamál á heimsvísu. 

„Með aðferðafræði hönnunar að vopni hefur Björn Steinar beint athygli okkar að matarsóun, því stóra alþjóðlega vandamáli. Með því að útbúa vodka úr ávöxtum sem nýtast ekki annars staðar hefur Björn fundið leið til þess að nýta matarúrgang án þess að þurfa að hugsa um síðasta söludag. Þessi hugsun og framsetning opnar ekki bara augu okkar fyrir því hvers vegna og hvernig hægt sé að leysa vandamálið, heldur setur Björn punktinn yfir i-ið með því að gefa almenningi aðgang að hönnun á  eimingartæki sem breytir úrgang í vodka. Þar með býður hann okkur öllum í partíið.“

Nordurbakki

PKdm arkitektar og Teiknistofan Storð

Verkefnið Norðurbakki samanstendur af tveimur fjölbýlishúsum, ásamt garði á milli sem tengir þau saman, nálægt gömlu höfninni í Hafnarfirði. Verkefnið er hannað af PKdM arkitektum í samstarfi við Teiknistofuna Storð.

„Fjölbýlishúsin á Norðurbakka minna á skipin sem lágu við festar í Hafnarfjarðarhöfn undir lok síðustu aldar, bæði hvað varðar efnisval og form. Húsin eru dæmi um djarfan arkitektúr og landslagsarkitektúr í bæjarumhverfi. Garðurinn á milli húsanna rímar einkar vel við byggingarnar og er mikil prýði fyrir bæjarmyndina.“

  • Sigríður Sigurjónsdóttir er formaður dómnefndar. Hún er forstöðumaður Hönnunarsafns Íslands og fyrrum prófessor í vöruhönnun við Listaháskóla Íslands. Sigríður stofnaði og rak hönnunargalleríið SPARK frá 2010 – 2016. Hún stýrði verkefninu Stefnumót Bænda og Hönnuða hjá Listaháskóla Íslands og hefur síðastliðið ár unnið að ferðaþjónustuverkefninu placetoread.is með áherslu á lestur bóka.

  • Krisján Örn Kjartansson er einn stofnanda arkitektastofunnar KRADS sem er starfrækt á Íslandi og í Danmörku. Hann er varaformaður stjórnar Hönnunarmiðstöðvar þar sem hann situr fyrir hönd Arkitektafélags Íslands. Kristján hefur verið stundakennari við arkitektadeild Listaháskóla Íslands síðustu ár og hefur kennt lokaverkefni deildarinnar. Kristján tekur sæti Sigrúnar Birgisdóttur sem víkur sæti.

  • Högni Valur Högnason er aðstoðar-hönnunarstjóri hjá Brandenburg. Hann er fyrrum formaður Félags íslenskra teiknara (FÍT) og sat í stjórn Myndstefs. Verk hans hafa verið birt í alþjóðlegum tímaritum og bókum og sýnd á listasöfnum hérlendis. Högni hefur unnið til verðlauna bæði fyrir hönnun í FÍT-keppninni og á Lúðrinum, íslensku auglýsingaverðlaununum. Þá hefur hann hefur verið yfirdómari í FÍT-keppninni og setið í dómnefnd Ímark. Högni Valur situr hjá við dómnefndarstörf 2018 og mun Einar Geir ngvarsson grafískur hönnuður taka sæti hans í dómnefnd.

  • Sigrún Halla Unnarsdóttir er fatahönnuður, stofnandi og meðlimur í hönnunarteyminu IIIF, stofnandi AD og meðlimur í stjórn LungA skólans. Sigrún er með MA gráðu í fatahönnun og starfar í faginu en hefur einnig fengist við þverfagleg hönnunartengd verkefni og kennslu. Verk hennar hafa birst í bókinni Fashion 2 sem forlagið Alt/Cramer í Berlín gaf út og hlotið hönnunarverðlaun Grapevine með teyminu sínu IIIF fyrir vörulínu ársins.

  • Daniel Golling er blaðamaður á alþjóðlegu sviði hönnunar og arkitektúrs. Fyrrverandi ritstjóri FORM Magazine og einn af stofnendum Summit hljóðvarpsins.

  • Jóhanna Vigdís Arnardóttir er verkefnastjóri á menntasviði og viðskiptastjóri á framleiðslusviði Samtaka iðlanaðarins. Jóhanna Vigdís er MBA frá Háskólanum í Reykjavík og menntuð leikkona frá Leiklistarskóla Íslands en hún starfaði í 18 ár á sviði leiklistar hjá Borgarleikhúsinu. Jóhanna situr í dómnefnd Hönnunarverðlauna Íslands fyrir hönd Samtaka Iðnaðarins.

  • Einar Geir Ingvarsson hefur starfað við grafíska hönnun frá 1999. Hann stofnaði E&Co. 2010. Hann hefur hlotið fjölda verðlauna og viðkenninga fyrir sín störf. Einar Geir tekur sæti Högn Vals Högnasonar sem víkur sæti.

  • Varamenn dómnefndar: Björn Guðbrandsson prófessor í arkitektúr við Listaháskóla Íslands og einn eigenda ARKÍS arkitekta; Jörundur Guðmundsson fatahönnuður; Birna Geirfinnsdóttir lektor við hönnunar- og arkitektúrdeild Listaháskóla Íslands og fagstjóri brautar í grafískri hönnun; Einar Geir Ingvarsson grafískur hönnuður. Sigrún Birgisdóttir arkitekt og deildarforseti hönnunar- og arkitektúrdeildar Listháskóla Ísland situr hjá við dómnefndarstörf 2018 og Kristján Örn Kristjánsson stígur inn í hennar stað.

hönnunarverðlaunum íslands er ætlað að vekja athygli á mikilvægi og gæðum íslenskrar hönnunar og arkitektúrs.

hönnunarverðlaunin eru mikilvægur liður í að beina sjónum að því besta sem gert er á sviði hönnunar og arkitektúrs á íslandi um leið og einstaka hönnuðum eða hópum hönnuða er veitt mikilvæg viðurkenning.

vægi hönnunar í menningu okkar, samfélagi og viðskiptalífi er óðum að aukast. þess vegna er mikilvægt að auka skilning á gildi góðrar hönnunar en hönnunarverðlaun geta leikið mikilvægt hlutverk þar.

Hönnunarmiðstöð Íslands stendur að verðlaununum, í samstarfi við Hönnunarsafn Íslands, Listaháskóla Íslands, Landsvirkjun og Samtök iðnaðarins.

verðlaunin verða veitt hönnuði, arkitekt, hönnunarteymi eða stofu fyrir framúrskarandi ný verk; einstakan hlut, verkefni eða safn verka. hönnuðir þurfa að vera félagar í einu af aðildarfélögum hönnunarmiðstöðvar íslands eða fagmenn á sínu sviði til að hljóta verðlaunin. ný verk eru verk sem lokið hefur verið við á síðustu tveim til þremur árum fyrir afhendingu verðlaunanna.

við val á verðlaunahafa mun haft í huga að verið er að leita að framúrskarandi verki, eða safni verka, sem standa á sem fulltrúi þess besta sem gert er á sviði hönnunar og arkitektúrs. verkið/verkin þurfa að vera framúrskarandi, fela í sér frjóa hugsun, snjalla lausn, vandaða útfærslu og fagmennsku í öllum vinnubrögðum.

hönnunarverðlaun íslands eru peningaverðlaun að upphæð 1.000.000 krónur, sem hafa verið veitt af ráðherra ferðlamála, iðnaðar- og nýsköpunar. 

Besta fjárfesting í hönnun er viðurkenning sem veitt var í fyrsta sinn 2015. Fyrirtæki sem eiga þess kost að hljóta viðurkenninguna Besta fjárfesting í hönnun hafa hönnun og arkitekúr að leiðarljósi frá upphafi verka til að auka verðmætasköpun og samkeppnishæfi. Öll fyrirtæki sem starfa á Íslandi koma til greina.