HÖNNUNarVErÐlaUN íslaNds 2019

header

Hönnunarverðlaun Íslands 2019 fóru fram þann 14. nóvember við hátíðlega athöfn í Iðnó. Kynnir var Greipur Gíslason og Þórdís Kolbrún R. Gylfadóttir, ráðherra veitti verðlaunin.

Verðlaunað var í tveimur flokkum: Hönnun ársins 2019 og viðurkenningu fyrir Bestu fjárfestingu ársins 2019 í hönnun.

Í fyrsta sinn í ár voru veitt Heiðursverðlaun Hönnunarverðlauna Íslands. Heiðursverðlaun er viðurkenning veitt einstaklingi sem þykir hafa skilað framúrskarandi ævistarfi á sviði hönnunar og arkitektúrs á Íslandi.

Málþing tengt verðlaununum fór fram fyrr um daginn fyrir fullu húsi og bar yfirskriftina Hannað í hring – hönnun sem tæki til að þróa nýjar leiðir og sjálfbærar lausnir. Myndræn erindi var vel völdum hópi hönnuða ásamt áhugaverðum pallborðsumræðum í lokinn. Það var fjölmiðlakonan Fanney Birna Jónsdóttir sem stýrði málþinginu.

Hönnunarverðlaun íslands varpa ljósi á mikilvægi og gæði íslenskrar hönnunar og arkitektúrs, enda er vægi hönnunar í menningu, samfélagi og viðskiptalífi sífellt að aukast.

Hér eru sigurvegarar Hönnunarverðlauna Íslands 2019

Wave eftir Genki Instruments

Vinningshafi

Genki Instruments hlaut Hönnunarverðlaun Íslands 2019 fyrir Wave hringinn sem hannaður er til að auka upplifun og túlkun í tónlist.

Hringurinn er framsækin tæknilausn sem eykur möguleika tónlistamanna til sköpunar á þægilegan og notendavænan hátt.
„Genki Instruments er framsækið og hönnunardrifið tónlistartæknifyrirtæki þar sem hönnun, tækni, verkfræði, og tónlist renna saman í eitt. Wave er einstakt dæmi um framsækna hugmynd frumkvöðlafyrirtækis þar sem rannsókn, þróun og prófanir í gegnum allt hönnunarferlið skilar algerlega nýrri upplifun til notenda sem hefur hlotið lof víða um heim.“

Omnom

Besta fjárfesting í hönnun 2019

Omnom súkkulaðigerð hlaut viðurkenningu fyrir bestu fjárfestingu í hönnun 2019. 
„Ferlið á bak við vöruþróun er spennandi en Omnom hefur frá byrjun unnið með hönnuðum í öllu framleiðsluferlinu að heildrænni vöruupplifun, hvort sem það er súkkulaðið sjálft eða með vandaðri hönnun á umbúðum og framsetningu í verslunum. Fyrst með hönnuðinum André Visage og nú með Veronicu Filippin. Slík samvinna í öllu ferlinu er skýrt dæmi um hvernig hönnun getur haft afgerandi áhrif á vaxtarsögu og velgengni fyrirtækis.“

Manfreð Vilhjálmsson, arkitekt

Heiðursverðlaun Hönnunarverðlauna Íslands 2019

Hönnun og byggingar Manfreðs eru meðal bestu dæma um góðan arkitektúr á Íslandi en verkin bera vitni um vandaða hönnun og arkitektúr þar sem efni, form og samhengi skapa eina órjúfanlega heild.

Manfreð Vilhjálmsson arkitekt hefur markað djúp spor í sögu arkitektúrs á Íslandi. Einstakur starfsferill sem spannar yfir 60 ár endurspeglar áræðni í fjölbreyttum verkefnum og metnaðarfulla listræna og faglega sýn. Eftir Manfreð liggur fjöldi tímamótaverka sem bera vott um einstaka hæfni til að takast á við margvíslegar áskoranir staðhátta og uppbyggingar í ungu samfélagi.
Í verkum Manfreðs birtast margvíslegar nýjungar í íslenskri húsagerðalist en jafnframt sýna verk hans frá fyrstu tíð næmi á umhverfi og viðleitni við að leysa verkefni í samræmi við tíðaranda og í skýru menningarlegu samhengi.